Darganfyddwch sut y helpodd chwaraewyr y Postcode Lottery mewn ardaloedd trefol i gymryd rhan yn Gwylio Adar yr Ardd 2025 a 2026.
Gwylio Adar yr Ardd yr RSPB yw arolwg bywyd gwyllt mwyaf y byd mewn gerddi. Bob blwyddyn, mae cannoedd ar filoedd o bobl yn treulio awr, dros un penwythnos ym mis Ionawr, i gyfri’r adar yn eu hardal. Ond, mae llawer o bobl yn meddwl na allan nhw gymryd rhan, yn enwedig os nad oes ganddyn nhw fynediad at ardd breifat.
Yn yr RSPB, rydym ni’n credu bod natur a Gwylio Adar yr Ardd yn addas i bawb, ac rydym yn falch o ddweud bod dros 650,000 wedi cymryd rhan yn 2026. Roedd hyn yn cynnwys nifer o bobl oedd yn byw ym Manceinion a Glasgow, ardaloedd sydd â llai o erddi preifat nag ardaloedd eraill.
Diolch i chwaraewyr y Postcode Lottery mae hyn wedi bod yn bosibl.
Diolch i'r arian a godwyd gan chwaraewyr y Postcode Lottery, yn y cyfnod cyn Gwylio Adar yr Ardd 2025 a 2026, fe wnaethom anfon negeseuon post am ddim i 1,350,000 o gartrefi ym Mirmingham, Manceinion a Glasgow.
Roedd y negeseuon hyn wedi’u cynllunio i wneud Gwylio Adar yr Ardd yn fwy hygyrch i bawb, ac yn cynnwys canllawiau, siartiau adnabod a ffurflenni canlyniadau, ac yn egluro nad oes angen gardd breifat arnoch i gymryd rhan. Yn hytrach, gall pobl sy’n byw mewn ardaloedd trefol fynd i barc lleol, cyfri o ffenest eu hoff gaffi, neu edrych allan o’u balconi.
Yn 2026, cymerodd 52% mwy o bobl ym Manceinion, Glasgow a Birmingham rhan yn Gwylio Adar yr Ardd nag yn y blynyddoedd blaenorol, diolch i chwaraewyr y Postcode Lottery. Mae hyn yn cyfateb i 29,390 o bobl, ac roedd 4,642 o'r rheiny yn gweithredu dros fyd natur gyda’r RSPB am y tro cyntaf.
Mae llawer o’r cefnogwyr newydd hyn wedi cofrestru i glywed am sut gallan nhw helpu byd natur gyda’r RSPB, dod yn aelodau, neu roi rhoddion hael. Diolch, chwaraewyr y Postcode Lottery, rydych chi'n helpu digwyddiad Gwylio Adar yr Ardd i hedfan.
Rydym ni eisiau i ddigwyddiad Gwylio Adar yr Ardd fod mor gynhwysol â phosibl ac rydym ni wrth ein bodd bod cymaint o bobl wedi cymryd rhan eleni. Er bod dros naw miliwn o adar wedi eu cofnodi ledled y DU, mae nifer o’n hoff adar yn yr ardd yn dirywio. Mae hyn yn arbennig o wir mewn ardaloedd trefol.
Dyna pam ei bod mor bwysig ein bod yn ysbrydoli cynifer o bobl â phosibl er mwyn cysylltu â byd natur a chymryd rhan yn nigwyddiad Gwylio Adar yr Ardd. Nid yw peidio â chael mynediad at ardd werdd breifat yn eich rhwystro rhag cymryd rhan, a chawn ddarlun gwell o sut mae ein hadar yn ymdopi os oes mwy o wylwyr adar yr ardd.
Mae digwyddiad Gwylio Adar yr Ardd yn ffordd berffaith o dreulio rhywfaint o amser ym myd natur. Os hoffech chi ddysgu am fywyd gwyllt a gweld y gorau o fyd natur y DU, ymunwch â dros filiwn o bobl sy’n caru natur a chofrestrwch am ein cylchlythyr Notes on Nature.
Mae pob rhifyn yn cyflwyno’r newyddion diweddaraf i chi gan yr RSPB, yn ogystal â chanllawiau adnabod adar, ac awgrymiadau ymarferol i helpu i achub byd natur.