Gallwch sefydlu eich ymgyrch eich hun yn ystod y broses gynllunio i ddiogelu’r byd natur rydych chi’n ei garu.
Gall fod yn anodd iawn meddwl am ddechrau eich ymgyrch eich hun, ond does dim angen iddi fod felly. Cofiwch, does dim rhaid i chi fynd ati ar eich pen eich hun. Os ydych chi’n poeni am gynnig datblygu sy’n niweidio bywyd gwyllt yn eich ardal leol, mae’n debygol y bydd pobl eraill yn teimlo’r un fath â chi.
Dyma rai camau defnyddiol ar gyfer sefydlu ymgyrch:
Dechreuwch drwy ymchwilio i’r datblygiad arfaethedig a’r broses o wneud penderfyniadau yn ei gylch. Darllenwch yr holl ddogfennau a gyflwynwyd gyda’r cais cynllunio yn ofalus er mwyn deall beth sy’n cael ei gynnig a pham. Ymgyfarwyddwch â’r gwahanol gamau yn y broses a phryd y byddant yn digwydd (ee dyddiadau cau ar gyfer sylwadau cyhoeddus) fel nad ydych yn colli unrhyw gyfleoedd allweddol i ddylanwadu ar y cais. Defnyddiwch ein canllawiau Deall Cynllunio sy’n esbonio systemau cynllunio’r DU. Bydd hyn yn eich helpu i ddeall y broses gynllunio o’r dechrau i’r diwedd. Bydd yr ymchwil hon yn eich helpu i nodi materion allweddol i dynnu sylw atynt yn eich ymgyrch.
Ewch ati i ddod o hyd i bobl eraill o’r un anian sy’n frwd dros wrthwynebu neu ddylanwadu ar y datblygiad ac sy’n barod i’ch helpu i drefnu a rhedeg yr ymgyrch. Ceisiwch adeiladu tîm bach a gweithgar sy’n gallu rhannu tasgau, cynnal y momentwm a chynnal ysbryd y naill a’r llall. Heb hyn, gall fod yn frwydr unig. Meddyliwch am y sgiliau a’r rolau y bydd eu hangen ar eich tîm: er enghraifft, rhywun i wneud cysylltiadau cymdeithasol, rhywun i ymchwilio i’r data, rhywun i osod strategaeth, rhywun i siarad yn frwd dros yr ymgyrch, rhywun i gynnal yr ysbryd.
Edrychwch ar ein hawgrymiadau ar gyfer ymgysylltu a chysylltu ag eraill yn eich cymuned (rhan o’n hadnoddau ‘Gweithredu dros natur’ ehangach) i gael syniadau ynghylch ble i ddechrau.
Rydw i wedi clywed ei disgrifio fel ras gyfnewid – gwneud eich rhan a throsglwyddo’r baton i’r person nesaf, felly mae’n ymdrech tîm. Drwy wneud hynny rydych chi’n teimlo nad oes rhaid i chi wneud popeth eich hun a’ch bod chi’n cyflawni pethau (waeth pa mor fach)” -Hyrwyddwr natur lleol
Penderfynwch beth rydych chi eisiau ei gyflawni gyda’ch ymgyrch. Mae’n bwysig bod yn glir ynghylch hyn o’r dechrau, er mwyn sicrhau eich bod yn canolbwyntio eich ymgyrchu ar gyflawni’r nod hwn. Er enghraifft, gallai hyn gynnwys atal y datblygiad yn gyfan gwbl neu addasu’r cynlluniau i wneud y cynnig yn fwy ystyriol o natur.
Gweithiwch gyda’ch tîm i ddatblygu strategaeth ar gyfer cyflawni eich nodau. Sut allwch chi ddylanwadu ar y canlyniad yn fwyaf effeithiol? Gall mapio pŵer fod yn ymarfer defnyddiol i helpu i roi ffocws i’ch strategaeth, drwy nodi rhanddeiliaid allweddol sydd â dylanwad dros y broses o wneud penderfyniadau (gweler ein canllaw Sut mae defnyddio mapio pŵer yn eich cymuned i ddylanwadu ar gynllunio. Meddyliwch hefyd am yr adnoddau fydd eu hangen arnoch i gynnal eich ymgyrch – arian, amser, gwirfoddolwyr, sgiliau ac yn y blaen.
Datblygwch neges glir sy’n egluro pam eich bod yn gwrthwynebu’r datblygiad a beth yw’r effeithiau negyddol posibl. Dylai’r neges hon fod yn gryno, yn hawdd ei deall, a dylai ganolbwyntio ar y rhesymau mwyaf cymhellol pam y dylid gwrthwynebu neu addasu’r datblygiad. Mae llawer o enghreifftiau gwych ar gael os oes angen ysbrydoliaeth arnoch, fel Ymddiriedolaeth Natur Hampshire ac Ynys Wyth a RSPB Tipner West: ymgyrch Don’t Cross the Line.
Ewch ati i estyn allan at grwpiau eraill yn y gymuned y gallai’r cynigion datblygu effeithio arnynt, fel sefydliadau amgylcheddol, cymdeithasau cymdogaeth a busnesau lleol. Gall cynnwys grwpiau ac unigolion llai amlwg fel grwpiau hamdden ac artistiaid lleol hefyd eich helpu i greu ymgyrch ehangach, fwy creadigol. Gall adeiladu clymblaid amrywiol eich helpu i ehangu eich neges a chael mwy o gefnogaeth.
Os oes gan y safle neu’r rhywogaethau y gallai’r datblygiad effeithio arnynt unrhyw gysylltiadau diwylliannol, yn lleol neu’n genedlaethol, tynnwch sylw at y rhain yn eich ymgyrch i helpu i annog diddordeb a chysylltu eraill â’ch achos. Er enghraifft, mae gan Eosiaid gysylltiad diwylliannol cryf, sy’n cynnwys llawer o gerddi, caneuon a straeon enwog, gan gynnwys ‘Ode to a Nightingale’ gan Keats a ‘Romeo a Juliet’ gan Shakespeare.
Defnyddiwch amrywiaeth o dactegau i godi ymwybyddiaeth o’ch ymgyrch a’r materion sy’n ymwneud â’r datblygiad. Gallai hyn gynnwys creu taflenni neu bosteri (y gallech ofyn i fusnesau a thrigolion lleol eu harddangos), siarad mewn cyfarfodydd cyhoeddus, ysgrifennu llythyrau at bapurau newydd lleol ac estyn allan at y cyfryngau lleol (radio a theledu). Gallech hefyd fynd i ddigwyddiadau cymunedol (yn ogystal â threfnu rhai eich hun), postio ar gyfrifon cyfryngau cymdeithasol lleol/cymunedol, a chysylltu â sefydliadau lleol presennol i weld a allwch chi siarad yn eu cyfarfodydd neu a allent ddosbarthu deunyddiau eich ymgyrch. Edrychwch ar ein canllaw Sut mae cael y canlyniadau gorau o ymgyrchu i warchod natur ym maes cynllunio i gael rhagor o syniadau.
Roedd adeiladu rhwydwaith ar-lein yn wych, gydag ymgyrchwyr o bob cwr o’r wlad yn ail-drydar (‘X’ bellach) ac yn lleisio cefnogaeth. Mae’r cyfan yn helpu.” -Penny, Essex, hyrwyddwr natur lleol
Cysylltwch â’ch awdurdod cynllunio, gwleidyddion lleol, a phobl eraill sy’n gwneud penderfyniadau a fydd yn rhan o’r broses gynllunio. Gwnewch yn siŵr eu bod yn deall eich pryderon a bod gennych gefnogaeth y gymuned y tu ôl i chi.
Siaradais â phobl, llwyddais i gael arweinydd y cyngor i ddod i weld y safle gyda mi dim ond oherwydd i mi ofyn.” -Hyrwyddwr natur lleol
Os ydych chi eisiau ymgyrchu ar-lein, gall safleoedd fel change.org gynnal gweithgarwch eich ymgyrch. Gallant hefyd fod yn ffynhonnell ddefnyddiol o wybodaeth a chynnig llawer mwy o awgrymiadau ar sut mae ymgyrchu’n llwyddiannus.
Does dim rhaid i chi wneud popeth ar unwaith. Gall dechrau’n fach a chynyddu yn ôl yr angen fod yn ddefnydd effeithiol o’ch amser, eich egni a’ch adnoddau. Mae gennych y grym i sicrhau newid gwirioneddol yn eich ardal leol a chi sydd yn y sefyllfa orau i’w gyflawni. Pob lwc!
